കൊച്ചി: സംസ്ഥാനത്ത് റെക്കോര്ഡുകള് ഭേദിച്ച് കുതിക്കുന്ന സ്വര്ണവില 58,000ലേക്ക്. ഇന്ന് ഒറ്റയടിക്ക് പവന് 640 രൂപയാണ് വര്ധിച്ചത്. ഒരു പവന് സ്വര്ണത്തിന്റെ വില 57,920 രൂപയിലേക്ക് ഉയര്ന്നാണ് പുതിയ ഉയരം കുറിച്ചത്. ഗ്രാമിന് 80 രൂപയാണ് വര്ധിച്ചത്. 7240 രൂപയായാണ് ഒരു ഗ്രാം സ്വര്ണത്തിന്റെ വില ഉയര്ന്നത്.
കഴിഞ്ഞ ദിവസം പവന് 360 രൂപ വര്ധിച്ചതോടെയാണ് സ്വര്ണവില ആദ്യമായി 57,000 കടന്നത്. ഈ മാസത്തിന്റെ തുടക്കത്തില് 56,400 രൂപയായിരുന്നു ഒരു പവന് സ്വര്ണത്തിന്റെ വില. 56,960 രൂപയായി ഉയര്ന്ന് നാലിന് രേഖപ്പെടുത്തിയ റെക്കോര്ഡ് പഴങ്കഥയാക്കിയാണ് സ്വര്ണവില കുതിക്കുന്നത്. എട്ടു ദിവസത്തിനിടെ 1700 രൂപയാണ് വര്ധിച്ചത്.
