മലപ്പുറം: നിലമ്പൂര്‍ ഉപതെരഞ്ഞെടുപ്പില്‍ യുഡിഎഫിനോട് സഹകരിക്കണോ എന്നതില്‍ പി വി അന്‍വര്‍ ( P V Anvar ) ഇന്ന് നിലപാട് വ്യക്തമാക്കും. രാവിലെ ഒമ്പതു മണിക്ക് അന്‍വര്‍ വാര്‍ത്താസമ്മേളനം വിളിച്ചിട്ടുണ്ട്. യുഡിഎഫ് സ്ഥാനാര്‍ത്ഥി ആര്യാടന്‍ ഷൗക്കത്തിനെ പിന്തുണച്ചാല്‍ മുന്നണിയില്‍ അസോസിയേറ്റ് മെമ്പര്‍ഷിപ്പ് നല്‍കാമെന്നാണ് യുഡിഎഫ് കണ്‍വീനര്‍ അടൂര്‍ പ്രകാശ് അന്‍വറിനെ അറിയിച്ചിട്ടുള്ളത്.
യുഡിഎഫിന്റെ ഈ വാഗ്ദാനത്തോട് അന്‍വറിന്റെ നിലപാട് എന്താണെന്ന് ഇന്ന് വ്യക്തമാകും. അസോസിയേറ്റ് മെമ്പര്‍ഷിപ്പ് പോരെന്നും, ഘടകകക്ഷി ആക്കണമെന്നുമാണ് പി വി അന്‍വറിന്റെ നിലപാട്. ഈ നിലപാടില്‍ അയവു വരുത്തുന്നുണ്ടോ എന്നാണ് ഇനി അറിയേണ്ടത്. പി വി അന്‍വറിന്റെ നിലപാട് അറിഞ്ഞശേഷം തുടര്‍നിലപാട് സ്വീകരിക്കാനാണ് യുഡിഎഫിന്റെ തീരുമാനം. യുഡിഎഫ് ഏകോപനസമിതി ചേര്‍ന്നാണ് തൃണമൂല്‍ കോണ്‍ഗ്രസ് പാര്‍ട്ടിയെ മുന്നണിയിലെടുക്കാനാകില്ലെന്നും അസോസിയേറ്റ് അംഗത്വമാകാമെന്നും തീരുമാനിച്ചത്.