നെടുങ്കണ്ടം : ഇടുക്കി നെടുങ്കണ്ടം പച്ചടിയില്‍ അമ്മയെയും മകനെയും കൊന്നു കുഴിച്ചു മൂടിയതായി സംശയം. അമ്മയുടേയും മകന്റേയും തിരോധാനത്തെത്തുടര്‍ന്ന് നടത്തിയ പരിശോധനയിലാണ് വീട്ടുവളപ്പില്‍ കുഴിച്ചു മൂടിയ നിലയില്‍ രണ്ട് മൃതദേഹാവശിഷ്ടങ്ങള്‍ കണ്ടെത്തിയത്. ഒരു പുരുഷന്റേയും സ്ത്രീയുടേതുമാണ് മൃതദേഹങ്ങള്‍.

പച്ചടി സ്വദേശി മേരിക്കുട്ടിയുടെ വീട്ടുവളപ്പിലാണ് ശരീരഭാഗങ്ങള്‍ കണ്ടെത്തിയത്. പച്ചടി പൊന്നുട്ടയില്‍ മേരിക്കുട്ടി (70), റെജി (48) എന്നിവരെ ഈ മാസം രണ്ട് മുതല്‍ കാണാതായിരുന്നു. ഇവരുടേതാണ് മൃതദേഹങ്ങള്‍ എന്നാണ് പൊലീസിന്റെ സംശയം. മൃതദേഹത്തിന് ദിവസങ്ങളുടെ പഴക്കമുണ്ട്. അഴുകിയ നിലയിലാണ്. മൃതദേഹം മേരിക്കുട്ടിയുടേയും റെജിയുടേതുമാണോ എന്ന് സ്ഥിരീകരിക്കാന്‍ ശാസ്ത്രീയ പരിശോധന വേണ്ടി വരും.

സ്ഥലത്ത് ഫോറന്‍സിക് സംഘം പരിശോധന നടത്തുകയാണ്. മൃതദേഹങ്ങള്‍ പോസ്റ്റ്‌മോര്‍ട്ടത്തിനായി ഇടുക്കി മെഡിക്കല്‍ കോളജിലേക്ക് മാറ്റും. മേരിക്കുട്ടിയുടെ ഇളയ മകന്‍ സജിയെ വീട്ടില്‍ നിന്നും കാണാനില്ല. ഇയാള്‍ ഇരുവരേയും കൊന്ന് കുഴിച്ചിട്ടശേഷം മുങ്ങിയതാകാമെന്നാണ് പൊലീസിന്റെ പ്രാഥമിക നിഗമനം. സജിയെ കണ്ടെത്താനുള്ള അന്വേഷണം നെടുങ്കണ്ടം പൊലീസ് ഊര്‍ജ്ജിതമാക്കി.

വീട്ടില്‍ മേരിക്കുട്ടിയും മക്കളായ റെജിയും സജിയുമാണ് താമസിച്ചിരുന്നത്. ഇവര്‍ തമ്മില്‍ പതിവായി വഴക്കുണ്ടായിരുന്നതായി പൊലീസിന് വിവരം ലഭിച്ചു. വഴക്കിനൊടുവില്‍ അമ്മയേയും ജ്യേഷ്ഠനേയും സജി കൊലപ്പെടുത്തിയെന്നാണ് പൊലീസ് സംശയിക്കുന്നത്. മേരിക്കുട്ടിയെയും മകനെയും കാണാതായതില്‍ മകളാണ് പൊലീസില്‍ പരാതി നല്‍കിയത്. മേരിക്കുട്ടിയെയും റെജിയേയും കാണാതായതില്‍ സജി പരസ്പരവിരുദ്ധമായ കാര്യങ്ങളാണ് പറഞ്ഞിരുന്നതെന്ന് നാട്ടുകാര്‍ പറയുന്നു.

പത്തനംതിട്ട : കോന്നി ഇലകൊള്ളൂരില്‍ വീടിന്റെ പരിസരത്തു നിന്നും മൂന്നാം ദിവസവും പെരുമ്പാമ്പിന്റെ കുഞ്ഞിനെ കണ്ടെത്തി. ഇളകൊള്ളൂര്‍ സ്വദേശി നന്ദുകുമാറിന്റെ വീട്ടിലാണ് ഇന്നും പെരുമ്പാമ്പിനെ കണ്ടത്. കഴിഞ്ഞ വെള്ളി, ശനി ദിവസങ്ങളിലും വീടിനു സമീപത്തു നിന്നും പെരുമ്പാമ്പിന്‍ കുഞ്ഞുങ്ങളെ പിടികൂടിയിരുന്നു.

വെള്ളിയാഴ്ച രാത്രി കുഞ്ഞുമായി ഇരിക്കുമ്പോഴാണ് സിറ്റൗട്ടിന്റെ കമ്പിയില്‍ പാമ്പ് ചുറ്റിപ്പിണഞ്ഞ് ഇരിക്കുന്നത് കണ്ടത്. വിവരം അറിയിച്ചതോടെ വനംവകുപ്പ് ഉദ്യോഗസ്ഥരെത്തി പാമ്പിനെ പിടികൂടി. ശനിയാഴ്ച വൈകീട്ട് വീണ്ടും വീടിന്റെ മുറ്റത്ത് പെരുമ്പാമ്പിന്‍ കുഞ്ഞിനെ കണ്ടെത്തി. വീട്ടുകാര്‍ തന്നെ പാമ്പിനെ പിടികൂടി ചാക്കിലാക്കി വനംവകുപ്പ് ഉദ്യോഗസ്ഥരെ ഏല്‍പ്പിച്ചു.

ഇന്ന് വീണ്ടും മുറ്റത്തു നിന്നും പെരുമ്പാമ്പിന്‍ കുഞ്ഞിനെ കണ്ടെത്തി. വീട്ടുകാര്‍ പിടികൂടി ബക്കറ്റിലാക്കി വനംവകുപ്പ് ഉദ്യോഗസ്ഥര്‍ക്ക് കൈമാറി. പാമ്പിനെ ജനങ്ങള്‍ തന്നെ പിടികൂടരുതെന്നും, അപകടമാണെന്നും ആര്‍ആര്‍ടി മുന്നറിയിപ്പ് നല്‍കി. സമീപത്ത് പെരുമ്പാമ്പ് മുട്ടയിട്ട് വിരിഞ്ഞു കാണുമെന്ന സംശയത്തെത്തുടര്‍ന്ന്, നാട്ടുകാര്‍ അടുത്തുള്ള പറമ്പുകളിലെ കാടുകള്‍ വെട്ടിത്തെളിക്കുകയാണ്.

ജയ്പുര്‍: വണ്ടര്‍ കിഡ് വൈഭവ് സൂര്യവംശി ഐപിഎല്ലില്‍ കത്തും ഫോമിലാണ്. രാജസ്ഥാന്‍ റോയല്‍സ് ഓപ്പണറായ 15കാരന്റെ നിര്‍ഭയ ബാറ്റിങാണ് ക്രിക്കറ്റ് ലോകത്തെ അമ്പരപ്പിക്കുന്നത്. അതിനിടെ രണ്ട് കുഞ്ഞ് ആരാധകരെ താരം വട്ട് പിടിപ്പിക്കുന്ന പ്രാങ്ക് വിഡിയോ പുറത്തു വന്നു. വിമാനത്താവളത്തില്‍ വച്ച്, തന്നെ കാണാനെത്തിയ കുഞ്ഞ് ആരാധകരെയാണ് താരം തമാശയായി കളിപ്പിക്കുന്നത്. ഇതിന്റെ വിഡിയോ വൈറലായി മാറുകയും ചെയ്തു. രാജസ്ഥാന്‍ റോയല്‍സ് തന്നെയാണ് ഇതിന്റെ വിഡിയോ സമൂഹ മാധ്യമങ്ങളില്‍ പങ്കിട്ടത്.

രണ്ട് ചെറിയ കുട്ടികള്‍ ഫോട്ടോ എടുക്കണമെന്നു ആവശ്യപ്പെട്ടു വൈഭവിനെ സമീപിക്കുകയായിരുന്നു. ഇരുവരേയും താരം പിന്തിരിപ്പിക്കാനൊന്നും ശ്രമിക്കുന്നില്ല. പക്ഷേ ഫോട്ടോ സൗജന്യമായി എടുക്കാന്‍ സാധിക്കില്ലെന്നു വൈഭവ് പറയുന്നു. ഒരോ ഫോട്ടോയ്ക്കും തനിക്ക് 100 രൂപ വീതം തരണമെന്നാണ് താരം കുഞ്ഞ് ആരാധകരോടു ആവശ്യപ്പെടുന്നത്.

‘എന്റെ കൂടെ ഫോട്ടോയെടുക്കണമെങ്കില്‍ എനിക്ക് പണം തരണം. സത്യമായിട്ടും ഞാന്‍ പറയുകയാണ് ബ്രോ. എനിക്ക് ഓരോ ഫോട്ടോയ്ക്കും 100 രൂപ വേണം’- വൈഭവ് കുഞ്ഞുങ്ങളോടു പറയുന്നു.

കുഞ്ഞ് ആരാധകര്‍ ഇതുകേട്ട് തിരികെ പോയി 200 രൂപയുമായി മടങ്ങി വന്ന് വൈഭവിനു നല്‍കാന്‍ ഒരുങ്ങുന്നു. പിന്നാലെ താരം ഇത് പ്രാങ്കാണെന്നും നിങ്ങളെ തമാശയ്ക്കു കളിപ്പിച്ചതാണെന്നും പറയുന്നു. പിന്നീട് ആ കുട്ടികള്‍ക്കൊപ്പം ഫോട്ടോയ്ക്കു പോസ് ചെയ്ത് വൈഭവ് അവരെ ഹാപ്പിയാക്കി മടക്കുന്നു.

കഴിഞ്ഞ ദിവസമാണ് വൈഭവ് ഐപിഎല്‍ ചരിത്രത്തിലെ ഏറ്റവും വേഗമേറിയ മൂന്നാമത്തെ സെഞ്ച്വറി തൂക്കിയത്. സണ്‍റൈസേഴ്‌സ് ഹൈദരാബാദിനെതിരായ പോരാട്ടത്തില്‍ വെറും 36 പന്തിലാണ് താരം ശതകം നേടിയത്. 12 സിക്‌സുകള്‍ സഹിതമായിരുന്നു ഈ കിടിലന്‍ ബാറ്റിങ്. ഐപിഎല്ലിലെ താരത്തിന്റെ രണ്ടാം സെഞ്ച്വറി കൂടിയാണിത്.

സീസണില്‍ ഇതുവരെയായി 357 റണ്‍സാണ് താരം 8 കളിയില്‍ നിന്നു അടിച്ചെടുത്തത്. ആവറേജ് 44.63, സ്‌ട്രൈക്ക് റേറ്റ് 234.87. ഇതുവരെയായി 32 സിക്‌സുകളും 31 ഫോറുകളും താരം തൂക്കി. നാളെ പഞ്ചാബ് കിങ്‌സിനെതിരെയാണ് രാജസ്ഥാന്റെ അടുത്ത മത്സരം.

പൊഴുതന: പ്രകൃതി സംരക്ഷണവും ലഹരിവിരുദ്ധ ബോധവൽക്കരണവും കൈകോർത്തപ്പോൾ പൊഴുതന പഞ്ചായത്തിന്റെ മെഗാ ക്ലീനിങ് ശ്രദ്ധേയമായി. പാറത്തോട് മുതൽ 12-ാം പാലം വരെ നടന്ന ശുചീകരണ പ്രവർത്തനങ്ങൾ പഞ്ചായത്ത് പ്രസിഡന്റ് നാസർ കാതിരി ഉദ്ഘാടനം ചെയ്തു. വ്യക്തിശുചിത്വത്തിനൊപ്പം പരിസര ശുചിത്വവും സംരക്ഷിക്കപ്പെടേണ്ടത് അനിവാര്യമാണെന്ന സന്ദേശമാണ് ഈ കൂട്ടായ്മ മുന്നോട്ടുവച്ചത്.
​ശുചീകരണ പ്രവർത്തനങ്ങളുടെ ഭാഗമായി എക്സൈസ് വിമുക്തി മിഷൻ വയനാട് ജില്ലാ കോഡിനേറ്റർ എൻ.സി.സജിത്ത്കുമാർ അച്ചൂരാനം ലഹരിവിരുദ്ധ ബോധവൽക്കരണ സന്ദേശം നൽകി.”പ്രകൃതി സംരക്ഷണമായിരിക്കണം നമ്മുടെ ലഹരിയെന്നും, മാലിന്യമുക്തമായ പരിസരം ആരോഗ്യകരമായ ഒരു സമൂഹത്തിന്റെ അടിത്തറയാണെന്നും അദ്ദേഹം ഓർമ്മിപ്പിച്ചു.”

​പഞ്ചായത്തിലെ 15 വാർഡ് മെമ്പർ, സെക്രട്ടറി, ഹെൽത്ത് ഇൻസ്‌പെക്ടർ (എച്ച്.ഐ), ആശ വർക്കർമാർ, പഞ്ചായത്ത് ഉദ്യോഗസ്ഥർ എന്നിവർ ശുചീകരണത്തിന് നേതൃത്വം നൽകി. തൊഴിലുറപ്പ് പദ്ധതിയിലെ തൊഴിലാളികൾ, ഹരിതകർമ്മസേന അംഗങ്ങൾ എന്നിവരുടെ പങ്കാളിത്തം പരിപാടി വിജയമാക്കി. പഞ്ചായത്തിന്റെ വിവിധ ഭാഗങ്ങളിൽ നിന്നുള്ള മാലിന്യങ്ങൾ മെഗാ ക്ലീനിങ്ങിലൂടെ നീക്കം ചെയ്തത്.

തിരുവനന്തപുരം: കനത്ത ചൂടിനെത്തുടര്‍ന്ന് ഉപഭോഗം വന്‍തോതില്‍ വര്‍ധിച്ചതോടെ സംസ്ഥാനത്ത് വൈദ്യുത നിയന്ത്രണം ഏര്‍പ്പെടുത്തുന്നു. പീക്ക് ലോഡ് മാനേജ്‌മെന്റ് എന്ന പേരിലാണ് നിയന്ത്രണം. നിയന്ത്രണം ഇല്ലാതെ മുന്നോട്ടു പോകാനാകില്ലെന്ന നിലപാടിലാണ് വൈദ്യുതി ബോര്‍ഡ്.

15 മിനിറ്റ് മുതല്‍ അര മണിക്കൂര്‍ വരെയാകും വൈദ്യുതി നിയന്ത്രണം ഏര്‍പ്പെടുത്തുക. വൈദ്യുതമുടക്കം എസ്എംഎസ് ആയി ഉപഭോക്താക്കളെ അറിയിക്കും. അതാത് പ്രദേശത്തിന്റെ സാഹചര്യവും, വൈദ്യുത ഉപയോഗ തോതും പരിഗണിച്ചായിരിക്കും നിയന്ത്രണം ഏര്‍പ്പെടുത്തുക.

പീക്ക് മണിക്കൂറുകളിലെ വൈദ്യുതി ഉപയോഗം ക്രമീകരിച്ച് സഹകരിക്കണമെന്ന് കെഎസ്ഇബി അഭ്യര്‍ഥിച്ചു. വൈകീട്ട് ആറിനും രാത്രി 11 നും ഇടയില്‍ വൈദ്യുതി ഉപഭോഗം വളരെ ഉയര്‍ന്നിരിക്കുകയാണ്. ലോഡ് താങ്ങാന്‍ കഴിയാത്തത്ര തരത്തില്‍ ഉയരുമ്പോള്‍ സിസ്റ്റം തന്നെ തകരാറിലാകാന്‍ ഇടയാക്കുമെന്ന് കെഎസ്ഇബി പറയുന്നു.

നിലവിലെ പ്രതിസന്ധി തരണം ചെയ്യാൻ വൈകീട്ട് 6-നും രാത്രി 11-നുമിടയിൽ വൈദ്യുതി ഉപയോഗം പരമാവധി കുറയ്ക്കണം. പമ്പ് സെറ്റ്, ഇൻഡക്ഷൻ സ്റ്റൗ, വാട്ടർ ഹീറ്റർ, ഇസ്തിരിപ്പെട്ടി, വാഷിംഗ് മെഷീൻ, തുടങ്ങിയ ഉപകരണങ്ങളുടെ ഉപയോഗവും വൈദ്യുതി വാഹന ചാർജിങ്ങും ആറുമണിക്കുശേഷം ഒഴിവാക്കണം. എസിയുടെ താപനില 24-26 ഡിഗ്രി സെൽഷ്യസിൽ ക്രമീകരിച്ചും, അത്യാവശ്യമല്ലാത്ത ലൈറ്റുകളും മറ്റുപകരണങ്ങളും ഓഫ് ചെയ്തും സഹകരിക്കണമെന്നും കെഎസ്ഇബി ആവശ്യപ്പെട്ടു.

മീനങ്ങാടി: നിരവധി കേസുകളിൽ പ്രതിയായ യുവാവിനെ കാപ്പ പ്രകാരം നാടുകടത്തി. കൃഷ്‌ണഗിരി, കൊളഗപ്പാറ, കൈതകാട്ടിൽ വീട്ടിൽ, നവീൻ ദിനേശ്(25)നെയാണ് ആറു മാസത്തേക്ക് ജില്ലയിൽ നിന്നും നാടുകടത്തിയത്. വയനാട് ജില്ലാ പോലീസ് മേധാവി അരുൺ കെ. പവിത്രൻ ഐ.പി.എസ് സമർപ്പിച്ച റിപ്പോർട്ടിന്റെ അടിസ്ഥാനത്തിൽ കണ്ണൂർ റേഞ്ച് ഡെപ്യൂട്ടി ഇൻസ്പെക്ടർ ജനറൽ യതീഷ് ചന്ദ്ര ഐ.പി.എസിന്റെ ഉത്തരവ് പ്രകാരമാണ് നടപടി. ഇയാൾക്കെതിരെ സുൽത്താൻ ബത്തേരി സ്റ്റേഷനിൽ വധശ്രമം, ആക്രമിച്ചു പരിക്കേൽപ്പിക്കൽ, തെളിവ് നശിപ്പിക്കൽ, സംഘം ചേർന്ന് ആക്രമണം എന്നിങ്ങനെ നിരവധി കേസുകളുണ്ട്.

ജില്ലയിൽ എല്ലാ സ്റ്റേഷൻ പരിധികളിലെയും ഗുണ്ടകളെയും സാമൂഹ്യ വിരുദ്ധരെയും തരം തിരിച്ച് കൂടുതൽ പേർക്കെതിരെ കാപ്പയടക്കമുള്ള ശക്തമായ നിയമ നടപടികൾ സ്വീകരിച്ചു വരികയാണ്.

ഏറെ കാലമായി മുടങ്ങിക്കിടക്കുന്ന മൈസൂരു വിമാനത്താവള വികസന പദ്ധതി വേഗത്തിലാക്കുന്നതിനും ഭൂമി ഏറ്റെടുക്കലിലെ തടസ്സങ്ങൾ പരിഹരിക്കുന്നതിനുമായി മൈസൂരു എം.പി യദുവീർ കൃഷ്ണദത്ത ചാമരാജ വൊഡയാറുടെ നേതൃത്വത്തിൽ ഉന്നതതല യോഗം ചേർന്നു. വിവിധ സർക്കാർ ഏജൻസികൾ തമ്മിലുള്ള തർക്കങ്ങളും സാങ്കേതിക തടസ്സങ്ങളും കാലതാമസമില്ലാതെ പരിഹരിക്കാൻ എം.പി നിർദ്ദേശം നൽകി.

എയർപോർട്ട് അതോറിറ്റി ഓഫ് ഇന്ത്യ (AAI) വിമാനത്താവളത്തിലെ കമ്മ്യൂണിറ്റി ഹാളിൽ വിളിച്ചുചേർത്ത യോഗത്തിൽ ചാമരാജ മണ്ഡലം എം.എൽ.എ ജി.ടി. ദേവെഗൗഡ, എയർപോർട്ട് ഡയറക്ടർ പി.വി. ഉഷാകുമാരി, ജില്ലാ ഭരണകൂടം, പോലീസ്, ദേശീയപാത അതോറിറ്റി (NHAI), കെ.പി.ടി.സി.എൽ (KPTCL), സതേൺ റെയിൽവേ, കെ.ഐ.എ.ഡി.ബി (KIADB), ജലസേചന വകുപ്പ് എന്നിവയിലെ ഉന്നത ഉദ്യോഗസ്ഥർ പങ്കെടുത്തു.

റൺവേ വികസനം:
പദ്ധതിയുടെ ഒന്നാം ഘട്ടത്തിൽ നിലവിലുള്ള 1,740 മീറ്റർ നീളവും 30 മീറ്റർ വീതിയുമുള്ള റൺവേ, 2,300 മീറ്റർ നീളത്തിലേക്കും 45 മീറ്റർ വീതിയിലേക്കും ഉയർത്താനാണ് ലക്ഷ്യമിടുന്നത്. ഇതോടെ എയർബസ് എ-320, ബോയിംഗ് 737 തുടങ്ങിയ വലിയ വിമാനങ്ങൾക്ക് മൈസൂരുവിൽ സർവീസ് നടത്താൻ സാധിക്കും. ഇതിനായി ആകെ 240 ഏക്കർ ഭൂമിയാണ് ആവശ്യമായിട്ടുള്ളത്. ഇതിൽ 206 ഏക്കർ ഭൂമി ഇതിനകം കെ.ഐ.എ.ഡി.ബി ഏറ്റെടുക്കുകയും ഭൂമിയുടമകൾക്ക് നഷ്ടപരിഹാരം നൽകുകയും ചെയ്തിട്ടുണ്ട്.
എന്നാൽ മന്ദകള്ളി ഭാഗത്തുള്ള ഏഴ് ഏക്കർ റവന്യൂ ഭൂമി ഏറ്റെടുക്കുന്നതിൽ നിയമപരമായ തടസ്സങ്ങൾ നിലനിൽക്കുന്നുണ്ട്. ഈ ഭൂമി വിട്ടുനൽകുന്നതിലെ കാലതാമസം വികസന പ്രവർത്തനങ്ങളെ മൊത്തത്തിൽ ബാധിക്കുമെന്ന് എം.പി മുന്നറിയിപ്പ് നൽകി. ഏറ്റെടുത്ത ഭൂമിയിലെ മരങ്ങൾക്കും കെട്ടിടങ്ങൾക്കും അടിയന്തരമായി നഷ്ടപരിഹാരം നൽകാനും ഉദ്യോഗസ്ഥർക്ക് നിർദ്ദേശം നൽകി.

ദേശീയപാത 766 തിരിച്ചുവിടൽ:
റൺവേ നീളം കൂട്ടുന്നതിനായി ദേശീയപാത 766 തിരിച്ചുവിടുന്ന കാര്യവും യോഗം ചർച്ച ചെയ്തു. 3.5 കിലോമീറ്റർ പാത തിരിച്ചുവിടുന്നതിനായി 520 മീറ്റർ നീളമുള്ള ഭൂഗർഭ തുരങ്കം ഉൾപ്പെടെ 612 കോടി രൂപയുടെ പുതുക്കിയ പ്ലാൻ ദേശീയപാത അതോറിറ്റി സമർപ്പിച്ചിട്ടുണ്ട്. എന്നാൽ പദ്ധതിയുടെ അധികച്ചെലവ് ആര് വഹിക്കണം എന്ന കാര്യത്തിൽ എയർപോർട്ട് അതോറിറ്റിയും ദേശീയപാത അതോറിറ്റിയും തമ്മിൽ തർക്കം നിലനിൽക്കുന്നുണ്ട്. ഇക്കാര്യത്തിൽ അന്തിമ തീരുമാനത്തിനായി കേന്ദ്ര സർക്കാരിനെ സമീപിക്കുമെന്ന് അധികൃതർ അറിയിച്ചു.

സുരക്ഷാ ക്രമീകരണങ്ങൾ:
ഭൂഗർഭ തുരങ്കത്തിന്റെ പ്രവേശന കവാടങ്ങളിലെ സുരക്ഷാ പരിശോധനകൾക്കായി ബ്യൂറോ ഓഫ് സിവിൽ ഏവിയേഷൻ സെക്യൂരിറ്റിയുടെ അനുമതി തേടിയിട്ടുണ്ട്. സംസ്ഥാന പോലീസിന്റെ പ്രത്യേക സുരക്ഷാ പരിശോധനയ്ക്കും നിർദ്ദേശം നൽകി.
വൈദ്യുതി ലൈനുകൾ മാറ്റൽ, കനാൽ പുനർനിർമ്മാണം തുടങ്ങിയ വിഷയങ്ങളിൽ വിവിധ വകുപ്പുകൾ ഏകോപിതമായി പ്രവർത്തിക്കണമെന്ന് എം.പി യദുവീറും ജി.ടി. ദേവെഗൗഡയും ആവശ്യപ്പെട്ടു. മൈസൂരുവിന്റെ സാമ്പത്തിക വളർച്ചയ്ക്കും ഗതാഗത സൗകര്യങ്ങൾക്കും വിമാനത്താവള വികസനം അത്യന്താപേക്ഷിതമാണെന്ന് അവർ കൂട്ടിച്ചേർത്തു.

കൽപ്പറ്റ: ബഹുസ്വര സമൂഹത്തിൽ സഹിഷ്‌ണുതയോടുകൂടി ജീവിക്കുന്ന പൗരന്മാരുണ്ടാകുമ്പോൾ മാത്രമേ സുരക്ഷിത സമൂഹം രൂപപ്പെടുകയുള്ളൂ. സമൂഹത്തിൽ വർഗീയതയും വംശീയതയും വീർപ്പുമുട്ടി നിൽക്കുമ്പോൾ വീട് വെറുമൊരു താമസസ്ഥലമായി മാറാതെ കുടുംബാംഗങ്ങളെ സ്നേഹവും സഹിഷ്ണുതയും പരിശീലിപ്പിക്കുന്ന പാഠശാലകളായി മാറണമെന്ന് കെ എൻ എം മർകസുദ്ദഅ് വ സംഘടിപ്പിച്ച ജില്ലാ ഫാമിലി കോൺഫറൻസ് അഭിപ്രായപ്പെട്ടു. കേരള ജംഇയ്യത്തുൽ ഉലമ സംസ്ഥാന പ്രസിഡണ്ട് ഡോ. ജമാലുദ്ദീൻ ഫാറൂഖി ഉദ്ഘാടനം ചെയ്തു.

ജില്ലാ പ്രസിഡണ്ട് അബ്ദുൽ ഹക്കീം അമ്പലവയൽ അധ്യക്ഷനായിരുന്നു. ഇബ്രാഹിം ബുസ്താനി, അബ്ദുസമദ് പുൽപ്പള്ളി, കെ എൻ സുലൈമാൻ മദനി, സിപി അബ്ദുസമദ് , മുഹ്സിന പത്തനാപുരം, ഹാസിൽ കുട്ടമംഗലം, ഫൈസൽ നന്മണ്ട, അബ്ദുൽ ജലീൽ മദനി, മുഫ് ലിഹ് കെ, ബഷീർ സ്വലാഹി, അമീർ അൻസാരി, മഷ്ഹൂദ് മേപ്പാടി, ഷാനിദ് കുട്ടമംഗലം, സൈതലവി എൻജിനീയർ ഷെറീന ടീച്ചർ , സുബൈദ ടീച്ചർ എന്നിവർ പ്രസംഗിച്ചു.

അഞ്ചരക്കണ്ടി ദന്തല്‍ കോളജിലെ ഒന്നാം വര്‍ഷ ബിഡിഎസ് വിദ്യാര്‍ത്ഥിയായിരുന്ന തിരുവനന്തപുരം സ്വദേശി നിധിന്‍ രാജിന്റെ മരണത്തില്‍ അട്ടിമറി ആരോപിച്ചും കുറ്റവാളികളെ നിയമത്തിന് മുന്നില്‍ കൊണ്ടുവരണമെന്ന് ആവശ്യപ്പെട്ടും നാളെ (ഏപ്രില്‍ 28) കേരളത്തില്‍ സംസ്ഥാനവ്യാപക ഹർത്താല്‍.

52 ദളിത്, ആദിവാസി, പൗര സംഘടനകളുടെ കൂട്ടായ്മയായ നിതിൻ രാജ് ആക്ഷൻ കൗണ്‍സിലാണ് ഹർത്താലിന് ആഹ്വാനം ചെയ്തിരിക്കുന്നത്. ഹര്‍ത്താല്‍ ബന്ദായി മാറുമെന്നും എല്ലാവരും സഹകരിക്കണമെന്നും ഭാരവാഹികള്‍ കണ്ണൂര്‍ പ്രസ് ക്‌ളബ്ബില്‍ വാര്‍ത്താ സമ്മേളനത്തില്‍ ആവശ്യപ്പെട്ടു. രാവിലെ 6 മുതല്‍ വൈകുന്നേരം 6 വരെയാണ് ഹർത്താല്‍.

1. പൊതുഗതാഗതം പൂർണ്ണമായും സ്തംഭിച്ചേക്കാം

ഹർത്താല്‍ ബന്ദായി മാറുന്ന സാഹചര്യത്തില്‍ കെ.എസ്.ആർ.ടി.സി (KSRTC), സ്വകാര്യ ബസുകള്‍ എന്നിവ നിരത്തിലിറങ്ങാൻ സാധ്യത കുറവാണ്. ഓട്ടോറിക്ഷകളും ടാക്സികളും സർവീസ് നടത്തില്ലെന്ന് വിവിധ യൂണിയനുകള്‍ സൂചിപ്പിച്ചിട്ടുണ്ട്. ഇത് ദൂരസ്ഥലങ്ങളിലേക്ക് യാത്ര ചെയ്യേണ്ടവരെയും റെയില്‍വേ സ്റ്റേഷൻ, എയർപോർട്ട് എന്നിവിടങ്ങളിലേക്ക് പോകേണ്ടവരെയും സാരമായി ബാധിക്കും.

2. കടകമ്പോളങ്ങളുടെ പ്രവർത്തനം

അത്യാവശ്യ സാധനങ്ങള്‍ വില്‍ക്കുന്ന കടകള്‍ ഒഴികെ ബാക്കി എല്ലാ വ്യാപാര സ്ഥാപനങ്ങളും അടഞ്ഞുകിടക്കും. ഹർത്താലിന് ഐക്യദാർഢ്യം പ്രഖ്യാപിച്ച്‌ വ്യാപാരി വ്യവസായി ഏകോപന സമിതിയുടെ സഹകരണം കൂടി ഉണ്ടായാല്‍ വിപണികള്‍ നിശ്ചലമാകും. ഹോട്ടലുകള്‍ അടച്ചിടാൻ സാധ്യതയുള്ളതിനാല്‍ യാത്രക്കാർക്കും വീട്ടില്‍ ഭക്ഷണം പാകം ചെയ്യാൻ സൗകര്യമില്ലാത്തവർക്കും വലിയ ബുദ്ധിമുട്ട് നേരിടേണ്ടി വരും.

3. വിദ്യാഭ്യാസ സ്ഥാപനങ്ങളും പരീക്ഷകളും

സ്കൂളുകള്‍ക്കും കോളേജുകള്‍ക്കും അവധി പ്രഖ്യാപിക്കാൻ സാധ്യതയുണ്ട്. സർവകലാശാലകള്‍ നടത്താനിരുന്ന പരീക്ഷകള്‍ മാറ്റിവെക്കുമോ എന്ന കാര്യത്തില്‍ ഔദ്യോഗിക അറിയിപ്പുകള്‍ ഉടൻ വന്നേക്കാം. പരീക്ഷാ സീസണ്‍ ആയതിനാല്‍ വിദ്യാർത്ഥികള്‍ക്കും രക്ഷിതാക്കള്‍ക്കും ഇത് വലിയ ആശങ്കയാണ് നല്‍കുന്നത്.

4. ഐടി, ബാങ്കിംഗ് മേഖലകള്‍

ബാങ്കുകള്‍ പ്രവർത്തിക്കാൻ സാധ്യതയുണ്ടെങ്കിലും ജീവനക്കാർക്ക് ഓഫീസുകളില്‍ എത്താൻ കഴിയാത്ത സാഹചര്യം ഉണ്ടായേക്കാം. സ്വകാര്യ സ്ഥാപനങ്ങളിലും ഐടി പാർക്കുകളിലും ഹാജർ നില കുറയാൻ സാധ്യതയുണ്ട്. മിക്കവാറും സ്ഥാപനങ്ങള്‍ വർക്ക് ഫ്രം ഹോം സംവിധാനത്തിലേക്ക് മാറാൻ ജീവനക്കാർക്ക് നിർദ്ദേശം നല്‍കിയേക്കാം.

5. അത്യാവശ്യ സർവീസുകള്‍

പാല്, പത്രം, ആശുപത്രികള്‍, ആംബുലൻസ് സർവീസുകള്‍, മരുന്ന് കടകള്‍ എന്നിവയെ ഹർത്താലില്‍ നിന്നും ഒഴിവാക്കിയിട്ടുണ്ട്. എങ്കിലും രോഗികളെ ആശുപത്രിയില്‍ എത്തിക്കാൻ സ്വകാര്യ വാഹനങ്ങളെ ആശ്രയിക്കുന്നവർക്ക് നിരത്തിലിറങ്ങുന്നത് വെല്ലുവിളിയായേക്കാം.

പോലീസിന്റെ ഭാഗത്തുനിന്ന് കൃത്യമായ നടപടികള്‍ ഉണ്ടാകാത്ത പക്ഷം സമരം അനിശ്ചിതകാലത്തേക്ക് നീട്ടുന്ന കാര്യവും ആക്ഷൻ കൗണ്‍സില്‍ പരിഗണിക്കുന്നുണ്ട്. ക്രമസമാധാന പ്രശ്നങ്ങള്‍ ഒഴിവാക്കാൻ സംസ്ഥാനത്തുടനീളം പോലീസ് സുരക്ഷ ശക്തമാക്കും. അത്യാവശ്യ ഘട്ടങ്ങളില്‍ യാത്രക്കാർക്ക് പോലീസ് സഹായം തേടാവുന്നതാണ്.

കൊച്ചി: സംസ്ഥാനത്ത് സ്വര്‍ണവിലയില്‍ വര്‍ധന. പവന് 280 രൂപയാണ് കുറഞ്ഞത്. 1,13,240 രൂപയാണ് ഒരു പവന്‍ സ്വര്‍ണത്തിന്റെ വില. ഗ്രാമിന് 35 രൂപയാണ് കൂടിയത്. ഒരു ഗ്രാം സ്വര്‍ണത്തിന്റെ ഇന്നത്തെ വില 14,155 രൂപയാണ്.

എണ്ണവില കുത്തനെ ഉയര്‍ന്നതിനെ തുടര്‍ന്ന് കഴിഞ്ഞ ഏതാനും ദിവസങ്ങളിലായി സ്വര്‍ണവിലയില്‍ ഇടിവാണുണ്ടായത്. പശ്ചിമേഷ്യയില്‍ സംഘര്‍ഷം തുടരുന്നത് അടക്കമുള്ള വിഷയങ്ങളാണ് സ്വര്‍ണവിലയില്‍ പ്രതിഫലിക്കുന്നത്.

ഹോര്‍മൂസ്‌ കടലിടുക്കിലെ തുടര്‍ച്ചയായ തടസ്സങ്ങളുമാണ് ആഗോള വിപണിയില്‍ എണ്ണവില ഉയര്‍ന്ന് നില്‍ക്കാന്‍ കാരണം. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന്‍ വില ആദ്യമായി ഒരു ലക്ഷം കടന്നത്.