മലപ്പുറം: നിലമ്പൂര് ഉപതെരഞ്ഞെടുപ്പിലെ (nilambur election) യുഡിഎഫ് സ്ഥാനാര്ഥി ആര്യാടന് ഷൗക്കത്തിന്റെ തെരഞ്ഞെടുപ്പ് കണ്വെന്ഷനില് നിന്ന് വിട്ടുനിന്ന് പാണക്കാട് കുടുംബം. മുസ്ലിം ലീഗ് സംസ്ഥാന അധ്യക്ഷന് പാണക്കാട് സയ്യിദ് സാദിഖലി ശിഹാബ് തങ്ങള് ഹജ്ജിന് പോയതിനാലാണ് കണ്വെന്ഷനില് പങ്കെടുക്കാതിരുന്നത്. പകരം പങ്കെടുക്കേണ്ട, ലീഗ് മലപ്പുറം ജില്ലാ പ്രസിഡന്റ് കൂടിയായ പാണക്കാട് അബ്ബാസലി ശിഹാബ് തങ്ങള് പരിപാടിയില് നിന്ന് വിട്ടുനിന്നത് ചര്ച്ചയ്ക്ക് ഇടയാക്കിയിരിക്കുകയാണ്. കൂടാതെ, മുന് പ്രതിപക്ഷ നേതാവ് രമേശ് ചെന്നിത്തലയും മുന് കെപിസിസി അധ്യക്ഷന് കെ സുധാകരനും യോഗത്തില് പങ്കെടുത്തില്ല. വിഡി സതീശനും കെസി വേണുഗോപാലുമായുള്ള ഭിന്നതയാണ് വിട്ടുനില്ക്കാന് കാരണമെന്നാണ് രാഷ്ട്രീയകേന്ദ്രങ്ങള് പറയുന്നത്.
ജില്ലയില് തന്നെ ഉണ്ടായിട്ടും അബ്ബാസലി തങ്ങള് കണ്വെന്ഷനിലേക്കെത്തിയില്ല. ജില്ലിയിലെ മറ്റ് പരിപാടികളില് അബ്ബാസലി തങ്ങള് പങ്കെടുക്കുകയും ചെയ്തു. അബ്ബാസലി തങ്ങളെ കണ്വെന്ഷനിലേക്ക് ക്ഷണിച്ചതില് വീഴ്ചയുണ്ടായതാണ് വിട്ടുനില്ക്കാന് ഇടയാക്കിയതെന്നുമാണ് സൂചന.
