ന്യൂഡല്ഹി: കേണല് സോഫിയ ഖുറേഷിക്കെതിരെ അധിക്ഷേപ പരാമര്ശം നടത്തിയ ബിജെപി മന്ത്രി കുന്വര് വിജയ് ഷായ്ക്കെതിരെ രൂക്ഷ വിമര്ശനവുമായി സുപ്രീംകോടതി. തനിക്കെതിരെ കേസെടുത്ത നടപടി ചോദ്യം ചെയ്ത് മധ്യപ്രദേശ് ബിജെപി മന്ത്രി നല്കിയ ഹര്ജി പരിഗണിക്കുമ്പോഴായിരുന്നു സുപ്രീംകോടതിയുടെ വിമര്ശനം. വിജയ് ഷാക്കെതിരെ എഫ്ഐആര് രജിസ്റ്റര് ചെയ്ത നടപടി ചോദ്യം ചെയ്തുള്ള വിജയ് ഷായുടെ ഹർജി പരിഗണിക്കുന്നത് നാളത്തേക്ക് മാറ്റി.
മന്ത്രി നടത്തിയ പരാമര്ശങ്ങള് അംഗീകരിക്കാനാകാത്തതാണെന്ന് ചീഫ് ജസ്റ്റിസ് ബി ആര് ഗവായ് പറഞ്ഞു. ഭരണഘടനാ പദവി വഹിക്കുന്നയാള് ആ പദവിയുടെ അന്തസ്സ് പുലര്ത്തണം. ഒരു മന്ത്രി ഉച്ചരിക്കുന്ന ഓരോ വാക്കും ഉത്തരവാദിത്തത്തോടെയായിരിക്കണം. എന്തു തരം പരാമര്ശമാണത്. നിങ്ങള് അല്പം വിവേകം കാണിക്കണം. ഹൈക്കോടതിയില് പോയി മാപ്പു പറയൂ എന്നും കോടതി അഭിപ്രായപ്പെട്ടു.
