കൊല്ലം: കേരളത്തിലെ സിപിഎമ്മിന്റെ അമരക്കാരനായി എം വി ഗോവിന്ദന് തുടര്ന്നേക്കും. കൊല്ലത്ത് സമാപിക്കുന്ന 24-ാമത് സിപിഎം സംസ്ഥാന സമ്മേളനം, 71 കാരനായ മുന് എക്സൈസ് മന്ത്രിയെ സംസ്ഥാന സെക്രട്ടറിയായി ഔദ്യോഗികമായി തെരഞ്ഞെടുക്കും. പാര്ട്ടി സമ്മേളനത്തില് ഗോവിന്ദന് തിരഞ്ഞെടുക്കപ്പെടുന്നത് ഇതാദ്യമായാണ്.
2022 ഓഗസ്റ്റില് ആരോഗ്യസ്ഥിതി മോശമായതിനാല് കോടിയേരി ബാലകൃഷ്ണന് സ്ഥാനമൊഴിഞ്ഞതിന് പിന്നാലെയാണ്, സിപിഎം സംസ്ഥാന സെക്രട്ടേറിയറ്റ് ചേര്ന്ന് ഗോവിന്ദനെ സംസ്ഥാന സെക്രട്ടറിയായി തെരഞ്ഞെടുത്തത്. തുടര്ന്ന് സെപ്റ്റംബര് 2 ന് മന്ത്രിപദം രാജിവെച്ച് ഗോവിന്ദന് സംസ്ഥാന സെക്രട്ടറിയായി ചുമതലയേറ്റു. ഇതിനു പിന്നാലെ എം വി ഗോവിന്ദനെ സിപിഎം പോളിറ്റ് ബ്യൂറോയിലും ഉള്പ്പെടുത്തി.
കേരള പാര്ട്ടിയുടെ പ്രത്യയശാസ്ത്ര മുഖമായ കണ്ണൂര് നേതാവ് എം വി ഗോവിന്ദന്, പക്ഷെ ഇതുവരെ പിണറായി വിജയന്റെ നിഴലില് നിന്ന് പുറത്തുവന്നിട്ടില്ല. 2006 മുതല് സിപിഎം സംസ്ഥാന സെക്രട്ടേറിയറ്റ് അംഗമാണ്. കേരളത്തില് രണ്ട് തെരഞ്ഞെടുപ്പുകള് ( തദ്ദേശ- നിയമസഭ തെരഞ്ഞെടുപ്പുകള്) അടുത്തു വരുമ്പോള്, എം വി ഗോവിന്ദന് മുന്നിലുള്ളത് കഠിനമായ ദൗത്യമാണ്.
