തിരുവനന്തപുരം: പ്രതിപക്ഷ നേതാവ് വിഡി സതീശനെതിരെ 150 കോടിയുടെ അഴിമതി ആരോപണം ഉന്നയിച്ചത് മുഖ്യമന്ത്രിയുടെ പൊളിറ്റിക്കല് സെക്രട്ടറി പറഞ്ഞിട്ടാണെന്ന മുന് എംഎല്എ പിവി അന്വറിന്റെ പരാമര്ശത്തില് വക്കീല് നോട്ടീസയച്ച് പി ശശി. പ്രസ്താവന പിന്വലിച്ച് അന്വര് ഖേദം പ്രകടിപ്പിക്കണമെന്നും അല്ലാത്തപക്ഷം സിവില്, ക്രിമിനല് നടപടികള് സ്വീകരിക്കുമെന്നും വക്കീല് നോട്ടീസില് പറയുന്നു.
നേരത്തെ പിവി അന്വര് ഉന്നയിച്ച ആരോപണത്തിനെതിരെയും ശശി വക്കീല്നോട്ടീസയച്ചിരുന്നു. ഇതുമായി ബന്ധപ്പെട്ട് കേസ് കോടതികളില് നടക്കുന്നതിനിടെയാണ് വീണ്ടും വക്കീല് നോട്ടീസയച്ചിരിക്കുന്നത്. അന്വറിനെതിരെ അയക്കുന്ന നാലാമത്തെ വക്കീല് നോട്ടീസ് ആണിത്.
