സ്വീപിന്റെ ഭാഗമായി ജില്ലാ ടൂറിസം പ്രൊമോഷന് കൗണ്സിലിന്റെ ആഭിമുഖ്യത്തില് സംഘടിപ്പിക്കുന്ന വോട്ട് ആന്ഡ് റൈസ് ക്യാമ്പയിന് ജില്ലാ കളക്ടര് ഡി.ആര് മേഘശ്രീ ഫ്ലാഗ് ഓഫ് ചെയ്തു. ജില്ലയിലെ വോട്ടര്മാരുടെ എണ്ണം വര്ധിപ്പിക്കുക, വോട്ടിന്റെ പ്രാധാന്യത്തെക്കുറിച്ച് പൊതുജനങ്ങളില് അവബോധം സൃഷ്ടിക്കുക, യുവാക്കളെയും കായികതാരങ്ങളെയും ജനാധിപത്യ പ്രചാരണങ്ങളില് സജീവമായി ഉള്പ്പെടുത്തുക എന്നിവയാണ് ക്യാമ്പയിന്റെ ലക്ഷ്യം. ജനാധിപത്യത്തിനായി ഉയരങ്ങളിലേക്ക് കയറൂ എന്നതാണ് ക്യാമ്പയിന്റെ ആപ്ത വാക്യം.
ക്യാമ്പയിന്റെ ഭാഗമായി ടൂറിസം കേന്ദ്രങ്ങളില് എത്തുന്ന സന്ദര്ശകരിലേക്ക് ജനാധിപത്യത്തിന്റെ സന്ദേശം എത്തിക്കാന് ദേശീയ -സംസ്ഥാന തലത്തില് മികവ് തെളിയിച്ച കായിക താരങ്ങളെ ഉള്പ്പെടുത്തി ദീപശിഖ റാലിയും സംഘടിപ്പിച്ചു. കല്പ്പറ്റ സിവില് സ്റ്റേഷനില് നിന്ന് ആരംഭിച്ച് പൂക്കോട്, കാര്ളാട്, പഴശ്ശി പാര്ക്ക്, എടക്കല് തുടങ്ങിയ ജില്ലയിലെ വിവിധ വിനോദ സഞ്ചാര കേന്ദ്രങ്ങളിലൂടെ കടന്നു പോയി ചീങ്ങേരിയില് അവസാനിച്ചു. 20 നും 74 നും ഇടയില് പ്രായമുള്ള കായിക താരങ്ങളാണ് ദീപ ശിഖ റാലിയില് പങ്കാളികളായത്.
