തിരുവനന്തപുരം: 270 വര്ഷത്തിന് ശേഷം ശ്രീ പത്മനാഭ സ്വാമി ക്ഷേത്രത്തില് (Padmanabhaswamy Temple) അപൂര്വമായ മഹാ കുംഭാഭിഷേകം ചടങ്ങ് നടത്തുന്നു. ക്ഷേത്ര ശ്രീകോവിലിന്റെ പുനരുദ്ധാരണ പ്രവര്ത്തനങ്ങള് പൂര്ത്തിയാക്കിയ പശ്ചാത്തലത്തിലാണ് മഹാ കുംഭാഭിഷേകം നടത്തുന്നത്. ജൂണ് 8 നാണ് ചടങ്ങ് നിശ്ചയിച്ചിരിക്കുന്നത്. പുനരുദ്ധാരണ പ്രവര്ത്തനങ്ങള്ക്ക് ശേഷം ശ്രീകോവിലിന്റെ പവിത്രത പുനരുജ്ജീവിപ്പിക്കുക എന്നതാണ് മഹാ കുംഭാഭിഷേകം ചടങ്ങ് കൊണ്ട് ലക്ഷ്യമാക്കുന്നതെന്ന് ക്ഷേത്ര ഭാരവാഹികള് അറിയിച്ചു.
സുപ്രീം കോടതി 2017 ല് നിയമിച്ച വിദഗ്ദ്ധ സമിതിയുടെ നിര്ദ്ദേശപ്രകാരമാണ് പത്മനാഭ സ്വാമി ക്ഷേത്രത്തില് പുനരുദ്ധാരണ പ്രവര്ത്തനങ്ങള് നടപ്പാക്കിയത്. നവീകരണ പ്രവര്ത്തനങ്ങള് കോവിഡ് ഉള്പ്പെടെയുള്ള കാരണങ്ങളാല് നീണ്ടുപോയിരുന്നു. തുടര്ന്ന് 2021 മുതല് ഘട്ടം ഘട്ടമായുള്ള നവീകരണ പ്രവര്ത്തനങ്ങള് നടത്തിയാണ് ഇപ്പോള് പദ്ധതി പൂര്ത്തീകരിച്ചിരിക്കുന്നതെന്ന് ക്ഷേത്ര മാനേജര് ബി ശ്രീകുമാര് അറിയിച്ചു.
നൂറ്റാണ്ടുകള്ക്ക് ശേഷമാണ് പത്മനാഭ സ്വാമി ക്ഷേത്രത്തില് വിപുലമായ ശ്രീകോവിലില് പുനരുദ്ധാരണവും അനുബന്ധ ചടങ്ങുകളും നടക്കുന്നത്. ലോകമെമ്പാടുമുള്ള ഭക്തര്ക്ക് ഈ ആചാരങ്ങള് കാണാന് കഴിയുന്നത് അപൂര്വ അവസരം കൂടിയാണ് ലഭിക്കുന്നത് എന്നും ശ്രീകുമാര് പറയുന്നു.
ശ്രീകോവിലിനു മുകളില് മൂന്നെണ്ണവും ഒറ്റക്കല് മണ്ഡപത്തിന് മുകളില് ഒരെണ്ണവും ഉള്പ്പെടുന്ന പുതുതായി നിര്മ്മിച്ച താഴികക്കുടങ്ങളുടെ പ്രതിഷ്ഠ, പ്രധാന സമുച്ചയത്തിനുള്ളിലെ തിരുവമ്പാടി ശ്രീകൃഷ്ണ ക്ഷേത്രത്തില് വിശ്വക്സേന വിഗ്രഹത്തിന്റെ പുനഃപ്രതിഷ്ഠ, അഷ്ടബന്ധകലശം എന്നിവയാണ് മഹാ കുംഭാഭിഷേക ചടങ്ങില് ഉള്പ്പെടുന്നത്. മഹാ കുംഭാഭിഷേകത്തിന് മുമ്പുള്ള ദിവസങ്ങളില് ആചാര്യവരണം, പ്രസാദ ശുദ്ധി, ധാര, കലശം എന്നിവയുള്പ്പെടെ വിവിധ ആചാരങ്ങള് നടത്തുമെന്ന് ക്ഷേത്ര വൃത്തങ്ങള് അറിയിച്ചു.
