ചെന്നലോട്: സാന്ത്വന പരിചരണ രംഗത്ത് പുതിയ കാൽവെപ്പുമായി തരിയോട് ഗ്രാമപഞ്ചായത്ത്. ഓരോ വീട്ടിലും ഓരോ പാലിയേറ്റീവ് വളണ്ടിയർ എന്ന ലക്ഷ്യത്തോടെ തരിയോട് ഗ്രാമപഞ്ചായത്തിന്റെ നേതൃത്വത്തിൽ തരിയോട് സാമൂഹികാരോഗ്യകേന്ദ്രത്തിൻ്റെ സഹകരണത്തോടെ പെയിൻ & പാലിയേറ്റീവ് വളണ്ടിയർമാർക്കുള്ള പരിശീലനം ആരംഭിച്ചു. ഗ്രാമപഞ്ചായത്ത് പ്രസിഡണ്ട് ഷമീം പാറക്കണ്ടി ഉദ്ഘാടനം ചെയ്തു. ഗ്രാമപഞ്ചായത്ത് അംഗം സൂന നവീൻ അധ്യക്ഷത വഹിച്ചു. മെഡിക്കൽ ഓഫീസർ ഡോ. ദിവ്യകല മുഖ്യ പ്രഭാഷണം നടത്തി. ഗ്രാമപഞ്ചായത്ത് അംഗം ബീന റോബിൻസൺ മുഖ്യാതിഥിയായി.
പരിശീലന പരിപാടിക്ക് പങ്കാളിത്തം ഉറപ്പുവരുത്തുന്നതിന് ജനങ്ങൾക്ക് സൗകര്യപ്രദമായ രീതിയിൽ ഗ്രാമപഞ്ചായത്തിന്റെ അഞ്ചു പ്രദേശങ്ങളിലായിട്ടാണ് വ്യത്യസ്ത ദിവസങ്ങളിൽ പരിശീലന പരിപാടി നടക്കുക. ഇതിലൂടെ പരമാവധി ആളുകളെ സാന്ത്വന പരിചരണ രംഗത്ത് പ്രവർത്തിക്കാൻ പ്രാപ്തരാക്കും. ഹോം കെയർ പ്രവർത്തനങ്ങൾ സാന്ത്വന പരിചരണ രംഗത്തെ മറ്റു പ്രവർത്തനങ്ങൾ എന്നിവ സജീവമാക്കുന്നതിനും ഇതിലൂടെ സാധിക്കും.
പാലിയേറ്റീവ് ട്രയിനർമാരായ ശാന്തി അനിൽ, സ്വപ്ന എന്നിവർ പരിശീലനത്തിന് നേതൃത്വം നൽകി. ജനപ്രതിനിധികൾ, സന്നദ്ധപ്രവർത്തകർ, ആരോഗ്യ പ്രവർത്തകർ തുടങ്ങിയവർ പങ്കാളികളായി. ഹെൽത്ത് ഇൻസ്പെക്ടർ കിരൺ സ്വാഗതവും കമ്മ്യൂണിറ്റി നഴ്സ് ബിന അജു നന്ദിയും പറഞ്ഞു.
