കോഴിക്കോട്: ഷിരൂരില് മണ്ണിടിച്ചിലിനെ തുടര്ന്ന് കാണാതായ അര്ജുന്റെ മകന്റെ പ്രതികരണം തേടിയ യു ട്യൂബ് ചാനലിനെതിരെ കേസെടുത്ത് ബാലാവകാശ കമ്മീഷന്. കുട്ടിയോട് പരിധിവിട്ട ചോദ്യങ്ങള് ചോദിച്ചുവെന്ന് ചൂണ്ടികാണിച്ചാണ് നടപടി.
മഴവില് കേരളം എക്സ് ക്ലൂസീവ് എന്ന യൂട്യൂബ് ചാനലിനെതിരെ പാലക്കാട് സ്വദേശിയായ സിനില് ദാസാണ് പരാതി നല്കിയത്. അവതാരക കുട്ടിയോട് അപമര്യാദയായി പെരുമാറിയെന്നാണ് പരാതിയില് പറയുന്നത്. പോക്സോ വകുപ്പിന്റെ പരിധിയില് പെടുന്ന കുറ്റമാണ് അവതാരക ചെയ്തതെന്നും പരാതിയില് പറയുന്നു. പരാതിയുടെ അടിസ്ഥാനത്തില് അന്വേഷിച്ചു റിപ്പോര്ട്ട് നല്കാന് കമ്മീഷന് ജില്ലാ പൊലീസ് മേധാവിക്ക് നിര്ദേശം നല്കി
കുഞ്ഞിനോട് ചോദ്യം ചെയ്ത യൂട്യൂബ് വിഡിയോ ചാനല് അവതാരികയ്ക്ക് എതിരെ വ്യാപക വിമര്ശനം ഉയരുന്നു. കുഞ്ഞിന്റെ നേരെ മൈക്കുമായി ചെന്ന് പപ്പ എവിടെ പോയി? എന്ന് ചോദിക്കുന്നു. പപ്പ ലോറിയില് പോയി എന്ന് കുഞ്ഞ് പറയുമ്പോള് ലോറിയില് എവിടെ പോയി എന്ന് അവതാരക ചോദിക്കുന്നു. വിഡിയോ പുറത്ത് വന്നതിന് പിന്നാലെ സമൂഹമാധ്യമങ്ങളില് വ്യാപക വിമര്ശനം ഉയര്ന്നിരുന്നു.
